Pranvera rikthen shpendët shtegëtarë në Gjirokastër, bëhet apel për mbrojtjen e tyre

Stina e pranverës po rikthen në Gjirokastër shpendët shtegëtarë duke përfshirë edhe llojet e rralla të tyre. Lugina e Drinos shërben si habitat për shtegëtimin e shumë llojeve të shpendëve nga vendet e ngrohta. Aktualisht përgjatë kësaj lugine janë disa shpendë në rrezik zhdukje që kanë ndërtuar foletë e tyre.

“Siç dihet, kjo luginë është ndër luginat me rëndësi të veçantë jo vetëm për natyrën dhe faunën e saj por është me rëndësi të madhe dhe për shpendët, shtegëtarë, lugina është një korridor shtegëtimi për të gjitha llojet e shpendëve të cilët kalojnë nëpërmjet Afrikës, Ballkanit dhe në Europë, gjatë periudhës së shtegtimit me dhjetra e dhjetra lloje kalojnë nëpër këtë luginë ku disa lloje kryesore zgjedhin këtë luginë dhe për folezimin e tyre”, tha Grigor Dushi, Ambjentalist.

Lejleku është një shpend i rrallë që ka folezuar në luginën e Drinos. Ky lloj numëron më pak se 10 çifte në Shqipëri dhe listohet si lloj i rrezikuar në mënyrë kritike për zhdukje. Pjesë e shpendëve të radhë të rikthyer është edhe një lloj i kalit të qyqes në rrezik zhdukje. Ambjentalistët apelojnë për mbrojtjen dhe mosdëmtimin e këtyre shpendëve.

“Deri tani kemi konstatuar në Qarkun e  Gjirokastrës rreth 4 çifte lejlekësh që po folezojnë, lejleku vitet e fundit preferon që të folezojë në Qarkun tonë, gjithashtu edhe gjatë kësaj periudhe kemi konstatuar edhe dy çifte të kalit të qyqes të cilët kanë filluar të folezojnë në territoret e tyre, njëra është në Gjirokastër dhe tjetra në Bashkinë Dropull, ne jemi në monitorim të vazhdueshëm të këtyre shpendëve në mënyrë që këta të ruhen nga dëmtuesit dhe nga helmimet”, shtoi Dushi.

Zona e Gjirokastrës ka një florë dhe faunë mjaft të pasur dhe të larmishme që po shërbejnë edhe si atraksion turistik për vizitorët dhe dashamirësit e mjedisit.

LEXONI GJITHASHTU:

• Eurostat: Shqipëria ka pagën minimale në Europë, sipas fuqisë blerëse
• Bonusi i pranverës, jo mjaftueshëm për pensionistët në Durrës