Kriza parlamentare në Kosovë, Memli Krasniqi: Albin Kurti nuk ka dhënë dorëheqjen

Kryetari i Partisë Demokratike të Kosovës, Memli Krasniqi tha se nuk mund ta votojnë raportin e komisionit të përkohshëm për verifikimin e kuorumit dhe të mandateve të deputetëve, pasi sipas tij, është kundër kushtetues.

Pas ndërprerjes së seancës konstituive, Krasniqi në një adresim për media, tha se pa dhënë dorëheqje Qeveria e Kosovës, PDK-ja nuk do të votojë pro këtij raporti.

Pavarësisht publikimit të letrës së Kurtit për dorëheqje, Krasinqi tha se: “Njoftimi është në Facebook, shteti është më i rëndësishëm se postimet e Facebook-ut. Kurti nuk ka dhënë asnjë dorëheqje. Le të shkojë zotnia dhe të japë dorëheqje, pasi nuk mund të mbajë pozitat e deputetit dhe kryeministrit. Më falni, por unë nuk kam parë asnjë dorëheqje dhe ajo nuk ekziston. Dorëheqja nuk është se unë shkruaj një status në Facebook ose një letër në komision, kur ai është ende në detyrë dhe nuk është efektivisht i dorëhequr. Nuk është dorëheqje, ai është ende në funksionin e tij”

Ndër të tjera, kryetari i PDK-së, Memli Krasniqi tha se situata do të ishte ndryshe nëse kryemisnitri në detyrë, Albin Kurti dhe ministrat e tij do ta respektonin Kushtetutën e Kosovës.

“Nuk mund të votojmë një raport të tillë, sepse është kundërkushtetues. Aktualisht në të njëjtën kohë që nga kryeministri Kurti e gjithë ministrat që janë zgjedhur deputet po tentojnë të mbajnë edhe pozitë ekzekutive dhe legjislative që ua ndalon kushtetuta e Republikës së Kosovës. Pra, Kushtetuta e thotë qartë që nuk mund të bëhesh deputet nëse je kryeministër, nëse je ministër, këta janë sepse nuk kanë dhënë dorëheqje. Në mungesë të një dorëheqje tillë, PDK nuk mund të votojë një raport, i cili është në kundërshtim me Kushtetutën. Nëse do të ndodhë ajo që është kërkuar qysh herët, pra dorëheqja nga pozicionet ekzekutive, atëherë mund të ndryshojë situata”, tha Krasniqi.

LEXONI GJITHASHTU:

• Kosova në krizë parlamentare, dështon seanca e kostituive: Deputetët s’bëjnë betimin
• Kurti jep dorëheqje nga posti i Kryeministrit para betimit si deputet