“Mbrojeni flamurin, është thesari juaj”, kleriku rrëfen fjalët e Papa Françeskut

Papa Françesku, gjatë vizitës së tij të parë jashtë Vatikanit, zgjodhi Shqipërinë, një vizitë që forcoi lidhjet ndërmjet kombit dhe besimeve të tjera fetare në vend.

Dy vjet më parë, një përfaqësi e klerikëve të Korçës pati mundësinë të vizitonte Papën, duke i dhuruar dy objekte shumë simbolikë dhe të veçanta.

Një nga klerikët që pati mundësinë të diskutojë me Papa Françeskun, At Vangjeli, tregon për eksperiencën e tij personale dhe takimin me Atin e Shenjtë.

“Në vitin 2023, së bashku me një grup klerikësh nga Korça, vizituam Romën dhe Vatikani, ku patëm mundësinë të takohemi me Papën. Ne i dhuruam dy dhurata simbolike: një flamur kombëtar me mbishkrimin ‘Të gjithë vëllezër’ në shqip dhe latinisht, dhe një bastun me kokën e shqiponjës dy krenare të gdhendur.

Ishin dhurata shumë të veçanta, që shprehën atë që ne donim të përcillnim,” thotë At Vangjeli.

Por, si reagoi Papa Françesku ndaj flamurit shqiptar dhe çfarë u tha klerikëve të juglindjes? “Gjëja që na tha dhe që më ka mbetur në mendje ishte:

‘Mbrojeni, mbrojeni, se kjo është thesari juaj.’ Ky moment ishte i jashtëzakonshëm dhe na inkurajoi shumë të gjithë ne klerikët për atë që do të bënim me dhuratën që i kishim sjellë,” shton ai.

At Vangjeli e konsideron Papa Françeskun si një zë të fuqishëm në botën e sotme, përmes mesazheve të tij të unitetit dhe paqes.

“Ai ishte një nga zërat më të fuqishëm dhe të drejtpërdrejtë në situatën ku ndodhet bota. Zëra të tillë janë shumë të rëndësishëm dhe shpresojmë që kushdo që do të vijë pas tij, të jetë një zë i fuqishëm për harmoninë, paqen dhe dashurinë midis njerëzve,” thotë ai.

Në Kishën Katolike të Korçës do të mbahet një meshë përkujtimore për Papa Françeskun, ku besimtarët do të luten për të dhe për një Papë të ri të denjë.

LEXONI GJITHASHTU:

• Ambasadorja shqiptare në Vatikan: Papa Françesku ka pasur respekt për Shqipërinë
• Kardinalët takohen në Vatikan për të caktuar datën e varrimit të Papa Françeskut