Trajneri Orlando Koja largohet nga drejtimi i Skënderbeut për volejbollin e femrave

Pas një sezoni pa trofe, që u mbyll me humbjen në finalen për titullin kampion, trajneri Orlando Koja ka zyrtarizuar largimin e tij nga drejtimi i ekipit të volejbollit të femrave të Skënderbeut.

Ky vendim shënon fundin e një kapitulli të rëndësishëm për klubin korçar, i cili nën drejtimin e Kojës ka njohur një prej periudhave më të arta të historisë së tij të fundit.

Në tre vite në krye të ekipit, Koja arriti të ndërtojë një skuadër kompetitive, duke fituar një kampionat kombëtar, dy Kupa të Shqipërisë, dy trofe të Ligës Gjergj Kastrioti, një Kupë Pavarësie dhe dy Kupa të Federatës, një bilanc mbresëlënës që e pozicionoi Skënderbeun si një forcë dominuese në volejbollin shqiptar të femrave.

“E përfundoj këtë eksperiencë me krenari dhe mirënjohje” , deklaroi Koja, duke falënderuar lojtarët, stafin, Bashkinë e Korçës dhe tifozët për mbështetjen e vazhdueshme.

Largimi i tij lë pas jo vetëm trofe, por edhe një trashëgimi në organizim dhe profesionalizëm, që pritet të jetë bazë për sukseset e ardhshme të klubit.

Koja, tashmë i lirë nga angazhimet me Skënderbeun, mbetet një prej trajnerëve më të vlerësuar në volejbollin shqiptar dhe pritet me interes se cili do të jetë destinacioni i tij i radhës.

LEXONI GJITHASHTU:

• Arritje në sportin shqiptar, peshëngritësja shpallet Kampione Bote e trefishtë
• Berisha në Peqin: Me PD-në nuk do ketë rroga nën 500 euro dhe pensione nën 200 euro