Apeli pranon kerkësen e SPAK, nuk nisin hetimet ndaj Olta Xhaçkës dhe bashkëshortit

Apeli i GJKKO pranoi këtë të mërkurë ankimimin e Prokurorisë së Posaçme (SPAK), duke vendosur mosfillimin e hetimeve ndaj Olta Xhaçkës dhe bashkëshortit të saj.

Gjykata e Posaçme e Apelit për Korrupsionin dhe Krimin e Organizuar ka rrëzuar vendimin e Shkallës së Parë, e cila kishte urdhëruar regjistrimin e procedimit penal dhe nisjen e hetimeve ndaj ish-ministres Olta Xhaçka dhe bashkëshortit të saj, Artan Gaçi pas kërkesës së bërë nga Fredi Beleri.

Sipas vendimit të shpallur sot nga gjyqtarja Iliriana Olldashi, Apeli vendosi:

• Shfuqizimin e vendimit nr. 58, datë 28.02.2025 të Gjykatës së Posaçme të Shkallës së Parë për Korrupsionin dhe Krimin e Organizuar.

• Rrëzim e ankimimit të ankuesit Dh.A.B. (Fredi Beleri), me objekt shfuqizimin e shkresës së Prokurorisë së Posaçme që kishte vendosur mosfillimin e procedimit penal.

Vendimi i shkallës së parë, tashmë i shfuqizuar, kishte pranuar ankesën e Fredi Belerit dhe detyronte SPAK-un të regjistronte hetim penal për veprat “Shpërdorimi i detyrës”,

“Falsifikimi i dokumenteve” dhe “Pastrimi i produkteve të veprës penale”, në bashkëpunim, bazuar në kallëzimin penal nr. 181, datë 04.09.2023.

Me vendimin e sotëm, Apeli i jep të drejtë SPAK-ut, duke vendosur që nuk do të regjistrohet hetim për Olta Xhaçkën dhe bashkëshortin e saj.

LEXONI GJITHASHTU:

• SPAK ankimoi nisjen e hetimeve për Olta Xhaçkën, shtyhet seanca në Apelin e GJKKO
• Xhaçka: S’kam përfituar asgjë, investimi i bashkëshortit tim 100% privat