Euronews siguron dosjen e plotë të operacionit “Ura”, si funksiononte grupi kriminal

Euronews Albania ka siguruar dosjen e plotë të operacionit “URA” ku jepet një panoramë më e qartë sesi funksiononte grupi kriminial dhe nënndarjet e tij. Në një rast u tentua të trafikohej kokainë nga Peruja në valixhet e trupave diplomatik ndërsa në Rotherdam u kap një sasi prej 2.2 tonësh drogë.

Zbardhen episodet e tjera në dosjen e plotë e SPAK për grupin e Durrësit të drejtuar nga Elvis Doçi i njohur si “Visi i Pojës” i cili i shpëtoi arrestimit gjatë operacionit “ura” në bashkëpunim me antimafien e Barit.

Në bisedat e zbardhura në SKY ECC rezulton se grupi u investua me veprime konkrete për të trafikuar drogë edhe me valixhet e disa personave me pasaportë diplomatike që në korrik të vitit 2020 ishin me shërbim në Lima, Nikaragua dhe Guatemalë.

Nga hetimet, por dhe fotot që shkëmbenin në chatin e enkriptuar rezulton se anëtarët e grupit kishin informacion  mbi numrat e kontenierëve, kompanitë që i transportonin, anijet ku ishin ngarkuar si dhe datat e nisjes dhe mbërritjes.

Në një rast janë paguar 500 mijë dollarë amerikanë për sigurimin e 500 kg kokainë në Guajakil të Ekuadorit që do të trafikoheshin në Evropë.

Paratë janë kaluar nëpërmjet sistemit informal të njohur “ Hawala”, që është një metodë e transferimit të parave pa lëvizur në të vërtetë të holla fizike.

Po ashtu janë zbardhur edhe episodet e dërgimit të parave me autobusë në Shqipëri, ku shumat varjojnë nga 42 mijë euro deri në 280 mijë euro në dhjetëra episode me një total prej 4 milion eurosh.

Elvis Doçi në bashkëpunim me persona të tjerë të paidentifikuar deri më tani, dyshohet nga SPAK edhe për trafikimin e një sasie prej 2.2 tonësh kokainë, sekuestruar në Rotherdam të Hollandës.

LEXONI GJITHASHTU:

• “URA”| Ish-efektivi Altin Morina kërkoi informacion nga Gledis Nano për trafikantët
• Grupi Troplini, vijon prej 4 orësh seanca për 14 të arrestuarit e operacionit “Ura”