“Tifozët kuptojnë më shumë se Sylvinho”, legjenda Vasil Ruci kritikon trajnerin

Në një lidhje live për emisionin “Max Sport” në “Euronews Albania”, legjenda e futbollit shqiptar, Vasil Ruci, komentoi barazimin e Kombëtares me Serbinë.

Ai kritikoi trajnerin Sylvinho, duke theksuar se tifozët janë më inteligjentë se ai ndërsa përmendi një moment të veçantë nga ndeshja, ku tifozët u ngritën në këmbë duke kërkuar aktivizimin e Mirlind Dakut.

Sipas tij më pas trajneri vendosi ta hedhë në fushë dhe Ruci  e krahasoi këtë me një situatë të ngjashme që ndodhi edhe në Europianin e Gjermanisë me Armando Brojën.

“Brojën, lojtarin tonë më të mirë, e aktivizojmë në një vend që të shërbejë për ekipin dhe nuk i marrim maksimumin. Unë një pyetje kam: ne themi që kemi brezin më të mirë të lojtarëve te Shqipëria, po ky Silvinjo, është trajner më i mirë se Shqipëria, njësoj si Shqipëria apo më keq se Shqipëria? U ngrit gjithë stadiumi në këmbë dhe thërriste: ‘Daku, Daku’. Dhe në Europian, u ngrit stadiumi në këmbë dhe tha: ‘Broja, Broja’, u ngrit Silvinjo dhe futi Brojën. Nëse tifozët janë më inteligjentë se Silvinjo, kuptojnë më shumë se ai, atëherë nuk ke se çfarë të thuash”, tha Vasil Ruci.

LEXONI GJITHASHTU:

• “Letonia ka ekip të fortë por duam tre pikët”, Sylvinho: Manaj? Përgjegjësia ime
• Derbi i Ballkanit mbyllet në paqe 0 – 0, Shqipëria dhe Serbia ndajnë pikët