I akuzuar për plagosje të rëndë me dashje, ekstradohet nga Greqia 26-vjeçari

Një 26-vjeçar, i shpallur në kërkim ndërkombëtar për plagosjetë rëndë me dashje, është ekstraduar nga Greqia drejt Shqipërisë, si rezultat i operacionit policor ndërkombëtar të koduar “The Wanted”.

Bëhet fjalë për shtetasin Besmir Ajazi, i lindur në Kuçovë, ndaj të cilit Gjykata e Rrethit Gjyqësor Berat ka caktuar masën e sigurisë “Arrest në burg”, për veprën penale “Plagosja e rëndë me dashje”.

Ngjarja ka ndodhur në vitin 2023, në lagjen “Llukan Prifti” të Kuçovës, ku 26-vjeçari akuzohet se ka plagosur rëndë, disa herë me thikë, shtetasin E. B., gjatë një konflikti të çastit.

Ekstradimi u bë i mundur falë koordinimit mes Policisë së Shtetit, Interpol Tiranës dhe autoriteteve greke.

“Si rezultat i koordinimit të informacionit dhe veprimeve operacionale me homologët grekë, nëpërmjet Interpol Tiranës, gjatë kësaj faze të operacionit “The Wanted”, u lokalizua dhe u kap nga Policia greke, si dhe u ekstradua në Shqipëri, shtetasi shqiptar, i shpallur në kërkim ndërkombëtar, B. A., 26 vjeç, i lindur në Kuçovë”, njofton policia.