Trump mohon zhvendosjen e uraniumit nga Fordow: Asgjë nuk u nxor nga objekti

Presidenti amerikan Donald Trump ka reaguar ndaj spekulimeve të fundit se një pjesë e uraniumit të pasuruar mund të jetë zhvendosur nga centrali bërthamor iranian i Fordows, përpara sulmit ajror të ndërmarrë nga Shtetet e Bashkuara. Në një postim në rrjetet sociale, Trump i cilësoi këto pretendime si të pabaza dhe të pamundura logjikisht.

“Asgjë nuk u nxor nga objekti,” shkroi presidenti, duke shtuar se “nëse kjo do të ndodhte, do të zgjaste shumë kohë, do të ishte shumë e rrezikshme, shumë e rëndë dhe e vështirë për t’u lëvizur!”

Ai sqaroi gjithashtu raportimet për praninë e automjeteve të vogla në zonën përreth objektit, duke thënë se ato i përkisnin “punëtorëve të betonit që përpiqeshin të mbulonin pjesën e sipërme të boshteve të ventilimit”, jo ndonjë operacioni të zhvendosjes së materialit bërthamor.

Deklaratat e Trump vijnë pas një konference për shtyp të mbajtur nga Sekretari i Mbrojtjes, Pete Hegseth, i cili gjithashtu mohoi mundësinë e largimit të uraniumit nga Fordow. Hegseth theksoi se objektivi ishte goditur me saktësi dhe se sulmet kishin penguar ndjeshëm programin bërthamor iranian.

Më herët, shefi i Shtabit të Përbashkët, gjenerali Caine, bëri të ditur se qendër e sulmeve ishin boshtet e ventilimit të centralit, të cilat përbëjnë një pikë të ndjeshme teknologjike në strukturën e tij nëntokësore.

Zyrtarët amerikanë mbeten të rezervuar për detaje të mëtejshme, por vijojnë të insistojnë se ndërhyrja ushtarake ka qenë “efektive dhe precize” në goditjen e objektivave strategjike të Iranit.

LEXONI GJITHASHTU:

• A u hoq uraniumi nga centralet para goditjes? Flet Sekretari Amerikan i Mbrojtjes
• Khamenei “shpall fitoren” ndaj Izraelit: Pavarësisht zhurmës, regjimi është shtypur
• Lideri Suprem i Iranit reagon për herë të parë pas armëpushimit me Izraelin