Vuçiç ndaj studentëve protestues: Ultimatumi juaj nuk është pranuar

Presidenti i Serbisë, Aleksandar Vuçiç, deklaroi të premten se shteti serb nuk ka pranuar ultimatumet e drejtuara nga studentët protestues në prag të protestës së paralajmëruar për 28 qershor në Beograd.

“Serbia nuk e ka pranuar ultimatumin. Fuqitë e mëdha të huaja kanë dërguar sërish ultimatum, këtë herë përmes bashkëpunëtorëve të tyre vendas. Por përgjigjja jonë ka qenë dhe mbetet e njëjtë,” u shpreh Vuçiç në një intervistë për televizionin Pink.

Studentët që kanë bllokuar fakultetet në kryeqytet kërkojnë shpalljen e zgjedhjeve të jashtëzakonshme parlamentare dhe ndërprerjen e tubimit në qendër të Beogradit, ku për tre muaj me radhë kanë qëndruar kundërshtarët e tyre, të vetëquajtur “studentët që duan të mësojnë”.

Protestuesit kanë dhënë afat deri më 28 qershor në orën 21:00 për përmbushjen e kërkesave, duke paralajmëruar se në rast të kundërt do të nisin forma të mosbindjes civile.

Presidenti Vuçiç i hodhi poshtë kërcënimet, duke theksuar: “Ultimatumi nuk është pranuar, kështu që nuk duhet të prisni deri nesër në orën 21:00.”

Protesta e Vidovdanit, që pritet të zhvillohet të shtunën, shihet si një moment kritik në krizën e brendshme politike në Serbi, ndërsa tensionet mes qeverisë dhe studentëve vazhdojnë të rriten.

LEXONI GJITHASHTU:

• Gazetari shqiptar në Rusi: Samiti i Hagës u prit vakët në Moskë, çfarë mendon Putini
• Trump: Ndërpresim menjëherë bisedimet tregtare me Kanadanë