Mbështetja e turizmit, qeveria 100 milionë lekë për promovim e Shqipërisë si vend “COVID Free”

Me avancimin e procesit të vaksinimit, qeveria shqiptare ka vendosur në prioritetet e saj mbështetjen e sektorit të turizmit, që ishte ndër më të goditurit nga pandemia e COVID-19.

Me këtë qellim, qeveria ka akorduar një shtesë fondi prej 100 milionë lekësh (rreth 820 mijë euro) për programin “Zhvillimi i turizmit”, për të promovuar vendin në prag të sezonit turistik.

Vendimi është marrë në mbledhjen e zhvilluar në 12 maj nga Këshilli i Ministrave, ku me anë të këtij fondi pritet të realizohet promovimi i Shqipërisë në vendet ndërkombëtare, si një destinacion mikpritës nën etiketën “COVID Free” (Pa COVID).

Gjatë vitit 2020 në Shqipëri hynë rreth 3.8 milionë njerëz më pak se vitin paraardhës – ose 58.5%. Rënia ka qenë thuajse e njëjtë edhe për hyrjen e shtetasve shqiptarë. Shkak u bënë masat kufizuese ndaj COVID-19 dhe detyrimi për karantinë.

Sipas të dhënave të qeverisë sektori i turizmit kontribuon direkt në rreth 1 miliardë euro në Prodhimin e Brendshëm Bruto. Në këtë sektor janë punësuar rreth 290 mijë persona.

LEXONI GJITHASHTU:

• Turizmi, Shqipëria me 3.8 milionë vizitorë më pak se një vit më parë