Fundoset trageti në brigjet e Balit, katër të vdekur e dhjetëra të zhdukur

Të paktën katër persona kanë humbur jetën dhe dhjetëra të tjerë rezultojnë ende të zhdukur pasi një traget u fundos pranë ishullit turistik të Balit në Indonezi, njoftuan autoritetet të enjten.

Anija, e cila mbante 53 pasagjerë dhe 12 anëtarë të ekuipazhit, u fundos rreth orës 23:20 me orën lokale (15:35 GMT) të mërkurën, ndërsa po udhëtonte nga Banyuwangi, në bregun lindor të ishullit Java, drejt Balit.

Sipas Agjencisë Kombëtare të Kërkimit dhe Shpëtimit në Surabaya, 29 persona janë shpëtuar deri tani, ndërsa operacionet e kërkim-shpëtimit po vazhdojnë në det të hapur për të gjetur të zhdukurit.

Ende nuk është përcaktuar zyrtarisht shkaku i fundosjes, por sipas operatorit të tragetit, anija kishte raportuar probleme me motorin pak para se të zhdukej nga radarët.

Shumica e pasagjerëve të mbijetuar janë banorë të qytetit bregdetar Banyuwangi, ndërsa të tjerë vinin nga zona të ndryshme të ishullit Java, sipas një liste të publikuar nga autoritetet.

Presidenti i Indonezisë, Prabowo Subianto, i cili ndodhet në Arabinë Saudite për një vizitë zyrtare, ka urdhëruar një reagim të menjëhershëm emergjent, duke theksuar rëndësinë e mobilizimit të të gjitha burimeve për kërkim dhe ndihmë.

Ngjarja tragjike ka rikthyer vëmendjen mbi sigurinë detare në arkipelagun indonezian, ku incidentet me anije janë të zakonshme për shkak të standardeve të ulëta të mirëmbajtjes dhe mbingarkesës. Autoritetet kanë premtuar një hetim të plotë për zbardhjen e plotë të rrethanave të fundosjes.

LEXONI GJITHASHTU:

• Izraeli jep dritën jeshile për marrëveshjen e pengjeve, pritet përgjigjja e Hamasit
• Refuzohet lirimi me kusht për këngëtarin Daddy, përballet me 20 vite burg