I dha telefonin Veliajt gjatë shoqërimit, efektivi merret i pandehur nga SPAK

Një tjetër zhvillim ka ndodhur në hetimet për çështjen ndaj kryebashkiakut të Tiranës, Erion Veliaj. SPAK ka marrë të pandehur edhe një punonjës të Drejtorisë së Përgjithshme të Burgjeve, i cili akuzohet se i dha Veliajt një telefon gjatë transportit nga IEVP Durrës drejt Apelit të Posaçëm në Tiranë, ku do të shqyrtohej masa e sigurisë ndaj tij.

Prokuroria e Posaçme Kundër Korrupsionit dhe Krimit të Organizuar ka komunikuar zyrtarisht akuzën ndaj efektivit të burgjeve, duke e vlerësuar veprimin e tij si shkelje të rëndë ligjore. Hetimet po vijojnë për të zbuluar nëse ka edhe të tjerë të përfshirë në këtë episod.

Ndërkohë, akuzat janë komunikuar zyrtarisht edhe ndaj kryebashkiakut Veliaj dhe bashkëshortes së tij, Ajola Xoxa.

Erion Veliaj u arrestua më 10 shkurt në zyrën e tij në Bashkinë e Tiranës, me dyshimin për përfshirje në disa vepra penale: “Korrupsion pasiv i funksionarëve të lartë shtetërorë ose të zgjedhurve vendorë” (në 9 raste), “Pastrimi i produkteve të veprës penale” dhe “Fshehje ose deklarim i rremë i pasurisë”.

Bashkëshortja e tij, Ajola Xoxa, ndaj së cilës është urdhëruar masa e sigurisë “detyrim paraqitje”, akuzohet për përfshirje në të njëjtën çështje.

LEXONI GJITHASHTU:

• Ajola Xoxa paraqitet në SPAK, i komunikohet akuza zyrtare
• SPAK merr zyrtarisht të pandehur kryebashkiakun Erion Veliaj