Lirohet nga masa e arrestit në shtëpi kryetari i Bashkisë së Tropojës, Rexh Byberi

Gjykata e Posaçme Kundër Korrupsionit dhe Krimit të Organizuar ka liruar nga masa e arrestit në shtëpi kryetarin e Bashkisë Tropojë, Rexh Byberi, si dhe nënkryetarin Abedin Kërrnaja, të cilët po hetohen për shpërdorim detyre dhe prerje të paligjshme të pyjeve.

Gjykata ka vendosur ndaj tyre masën e detyrimit për t’u paraqitur një herë në muaj. Sipas avokatëve, ndaj Byberit dhe Kërrnajes ka përfunduar afati 6-mujor i masës së sigurisë, duke marrë si referencë vendimin e Gjykatës Kushtetuese për rastin Mimoza Margjeka.

Në një seancë më parë, gjykata i ka dhënë detyrë prokurorisë të konsultohet me ekspertët që kanë përcaktuar dëmin nga hapja e një rruge në Bashkinë Tropojë.

Prokuroria thotë se drejtuesi i Bashkisë së Tropojës, gjatë procesit për hapjen e një rruge me gjatësi 3.2 km, e cila kryesisht kalon nëpër rrugën këmbësore ekzistuese, nuk ka aplikuar në sistemin elektronik e-leje pranë Bashkisë Tropojë, si institucion vendor me tagrin për shqyrtimin dhe miratimin e lejes së ndërtimit të infrastrukturës.

Kjo pasi legjislacioni parashikon që pas verifikimit të dokumentacionit teknik dhe ligjor nga aplikuesi, leja të aprovohet nga autoriteti kompetent.

Prokuroria shton se Bashkia Tropojë duhej të bashkëvepronte me institucione të tjera kompetente, si Agjencia Kombëtare e Mjedisit për hartimin e Raportit të Vlerësimit të Ndikimit në Mjedis, dhe me Ministrinë përkatëse për vlerësimin e impaktit të ndërtimit të rrugës dhe pasojave të mundshme nga këto punime.

Rexh Byberi dhe Abedin Kërrnaja, të cilët aktualisht ndodheshin në arrest shtëpie, akuzohen për shpërdorim detyre dhe prerje të paligjshme të pyjeve.

LEXONI GJITHASHTU:

• Gjykata e Posaçme shtyn vendimin për kryebashkiakun e Tropojës, Rexhë Byberi
• GJKKO vendos arrest shtëpie për kryebashkiakun e Tropojës Rexhë Byberi