Trump i përgjigjet gazetarëve në avionin presidencial: Nuk do ketë biznes me Putin

Presidenti amerikan Donald Trump ka folur për gazetarët gjatë një udhëtimi drejt Alaskës me avionin presidencial Air Force One, duke komentuar mbi marrëdhëniet me Rusinë dhe zhvillimet në Ukrainë.

Trump tha se presidenti rus Vladimir Putin po udhëton me një grup të madh biznesmenësh nga Rusia, gjë që ai e cilësoi pozitive.

“Më pëlqen kjo, sepse ata duan të bëjnë biznes,” u shpreh Trump. Megjithatë, ai theksoi se nuk do të ketë bashkëpunim ekonomik mes dy vendeve për sa kohë që vazhdon lufta në Ukrainë.

“Nuk do të bëjmë biznes derisa të zgjidhet lufta. Lufta duhet të ndalet dhe vrasjet të marrin fund,” tha ai.

Duke komentuar mbi situatën ekonomike globale, Trump u shpreh se Shtetet e Bashkuara janë aktualisht “vendi më i nxehtë” në botë për nga atraktiviteti ekonomik, ndërsa Rusia, sipas tij, “nuk është e nxehtë ekonomikisht”. Sipas Trump, kjo është një nga arsyet pse Putini dëshiron të afrohet më shumë me SHBA.

Trump e përshkroi Putinin si një “njeri të zgjuar” dhe tha se mes tyre ekziston një “nivel i mirë respekti nga të dyja palët”.

Në lidhje me sulmet e vazhdueshme të Rusisë në Ukrainë, Trump deklaroi se Putini mund të mendojë se kjo strategji e ndihmon për të arritur një marrëveshje më të mirë, por në realitet “kjo e dëmton atë”.

LEXONI GJITHASHTU:

• Detajet e takimit Trump-Putin, nga biseda kokë më kokë, tek takimi i delegacioneve
• Lavrov flet për takimin Trump-Putin: Do të flasim qartë, Moska nuk bën hamendësime