Përballja Meta-Rama në Kushtetuese, Mustafaj: Balancimi i pushteteve kërkon një president më aktiv

Mosdekretimi i Gent Cakajt si ministër i Jashtëm nga Presidenti i Republikës ka çuar palët në Gjykatën Kushtetuese në lidhje me ushtrimin e kompetencave kushtetuese.

Presidenti Ilir Meta nuk pranoi të dekretonte Cakajn në krye të ministrisë për Evropën dhe Punët e Jashtme, ndërsa kryeministri Edi Rama këtë veprim u quajti tejkalim kompetencash të presidnetit dhe paralajmëroi nisjen e betejës ligjore.

Kjo e martë vuri përballë njëri-tjetrit në Gjykatën Kushtetuese përfaqësuesit e presidentit dhe të kryeministrit, ndërsa parashtruan pretendimet e tyre, sa i takon kompetencave për dekretimin e ministrave.

Ish-këshilltari i Gjykatës Kushtetuese, Dardan Mustafaj, tha se Kushtetuta e Shqipërisë në këtë pikë nuk është e qartë sa i takon kompetencave.

Në pikëpamjen e z. Mustafaj, kreu i shtetit me mosdekretimin e Cakajt nuk ka kryer shkelje të Kushtetutës.

“Duhet gjetur një lloj balance, sepse Kushtetuta nuk është e qartë në këtë. Në interpretimin tim presidenti nuk mund të quhet se është në shkelje të Kushtetutës.  Presidenti ka dhënë disa arsye kur ka vendosur mosdekretimin. Nëse kushtetuesja i jep të drejtë kryeministrit, nuk do të ndodhë asgjë, por do përcaktohet një normë”,  tha ai.

Ai e cilësoi pozitiv faktin e një diskutim të tillë në Gjykatën Kushtetuese, ndërsa shton se balancimi i pushteteve kërkon që Presidenti i vendit duhet të ketë rol më aktiv.

“Në vetvete fakti që ndodh ky diskutim është një gjë e mirë. Balancimi pushteteve kërkon që presidenti të jetë me aktiv dhe me prezent. Në vlerësimin tim Kushtetuta jonë kërkon një president më aktiv. Do të shërbej si precedent për raste të ngjashme, sepse është një mënyrë për ta mbajtur Kushtetutën me avancimin e kohës. Është e nevojshme të ketë një vazhdimësi dhe për këtë do zbatohet për këtë qeveri që do të vijë, por edhe për të tjerat. Brenda një muaji ose 45 ditë, besoj se Gjykata Kushtetuese do të marrë një vendim”, tha ai.

Lexoni gjithashtu: 

Gjykata Kushtetuese shqyrton “përplasjen” Rama-Meta për dekretet e ministrave