Salvini kritikoi ashpër Macronin, Parisi thërret ambasadorin italian

Parisi ka thirrur ambasadoren italiane në Francë, Emanuela D’Alessandro, pas komenteve të zëvendëskryeministrit italian, Matteo Salvini, ndaj presidentit francez Emmanuel Macron, lidhur me mbështetjen e Francës për dërgimin e trupave në Ukrainë.

Salvini i është drejtuar Macronit duke thënë: “Vish helmetën, xhaketën, pushkën dhe shko në Ukrainë”, duke komentuar propozimin e Francës për të dërguar trupa. Ai gjithashtu kritikoi planet e Macron për një “ushtri evropiane, riarmatim evropian dhe borxhe të përbashkëta evropiane për të blerë raketa”, sipas raportimeve të ANSA.

Ky incident ka detyruar autoritetet franceze të theksojnë se komentet e Salvinit janë në kundërshtim me klimën e besimit dhe marrëdhëniet historike midis Francës dhe Italisë, si dhe me konvergjencën e dy vendeve për mbështetjen e palëkundur ndaj Ukrainës.

Vendimi për thirrjen e ambasadores duket të jetë nxitur edhe nga sulmet e përsëritura të Salvinit ndaj Macron, të cilin shpesh e quan publikisht një “nxitës lufte” dhe një “bombardues”.

LEXONI GJITHASHTU:

• Lavrov: Trupat evropiane në Ukrainë krejt të papranueshme
• Zelensky: Së pari garancitë e sigurisë, pastaj samiti i Putinit