Shqiptarët dënohen në Britani për trafik kokaine, u zbuluan pas një hetimi të gjatë

Gjashtë shtetas shqiptarë janë dënuar me burgim nga autoritetet britanike, pasi u shpallën fajtorë për përfshirje në një rrjet kriminal që merrej me shpërndarjen e kokainës në zonën e Swindon.

Të dënuarit janë identifikuar si Saimir Neziraj, Nertil Halili, Edmir Beqiri, Ergys Abdyli, Ardian Gjeta dhe Jorgo Brachousai.

Policia e Wiltshire bëri të ditur se zbardhja e këtij aktiviteti kriminal erdhi pas një hetimi gjashtëmujor të koduar “Operacioni Young”, në bashkëpunim me Njësinë për Krimet e Rënda dhe të Organizuar (SOCU). Gjatë hetimeve, u identifikuan lokacionet që grupi përdorte për të fshehur dhe shpërndarë lëndën narkotike.

Sipas hetimeve, Saimir Neziraj ishte drejtuesi i rrjetit. Ai menaxhonte një linjë furnizimi me kokainë të quajtur “Denzel”, e cila shërbente për përdoruesit e përhershëm në Swindon. Neziraj kishte nën kontroll procesin e furnizimit dhe pagesave, ndërsa Edmir Beqiri kujdesej për ruajtjen e drogës në një magazinë të posaçme. Për shpërndarjen në rrugë përdoreshin Ardian Gjeta dhe Jorgo Brachousai, të cilët e kryenin këtë detyrë çdo ditë.

Pista hetimore mori drejtim të qartë më 1 shkurt 2024, kur Neziraj u pa duke udhëtuar drejt Londrës. Aty ai u takua me Ergys Abdylin për të marrë një sasi kokaine, e cila më pas u transportua në Swindon dhe u depozitua nga Beqiri.

Ndërkohë, Nertil Halili, që vepronte nga Derbyshire, kishte rol kyç në operacion. Ai mbante në kontroll telefonin e linjës “Denzel” dhe koordinonte shpërndarjen e drogës në terren me ndihmën e Nezirajt.

Policia ka deklaruar se një nga momentet kyçe që i ndihmoi në grumbullimin e provave ishte një takim i zhvilluar në mars 2024 në West Bromwich, ku Halili i dorëzoi telefonin Nezirajt. Kjo ngjarje shërbeu si element i rëndësishëm në hetim.

Në vijim të kësaj ngjarjeje, oficerët nga policia e Wiltshire, Derbyshire dhe Metropolitan ndërmorën një seri kontrollesh të koordinuara në Swindon, Derby dhe në veri të Londrës, ku u kapën sasi të konsiderueshme droge dhe para të gatshme. Gjatë këtyre bastisjeve u arrestuan të gjithë të dyshuarit.

Të gjashtë të pandehurit e kanë pranuar fajësinë për akuzat e ngritura dhe janë dënuar si më poshtë:

1. Saimir Neziraj, 32 vjeç – 8 vite burg
2. Nertil Halili, 29 vjeç – 7 vite e 10 muaj
3. Edmir Beqiri, 37 vjeç – 3 vite e 8 muaj
4. Ergys Abdyli, 26 vjeç – 5 vite e 11 muaj
5. Ardian Gjeta, 26 vjeç – 2 vite e 1 muaj
6. Jorgo Brachousai, 24 vjeç – 16 muaj

Hetuesi DC Hunt nga SOCU theksoi se operacioni ka pasur ndikim real në dobësimin e shpërndarjes së kokainës në Swindon.

“Gjatë muajve të fundit kemi punuar intensivisht për të zbuluar dhe çmontuar këtë rrjet kriminal. Kokaina mbetet një rrezik i madh për shoqërinë dhe ky operacion ka kontribuar ndjeshëm në mbrojtjen e komuniteteve tona. Inkurajojmë qytetarët që të raportojnë çdo informacion të mundshëm lidhur me trafikimin e drogës”, tha Hunt në një deklaratë për shtyp.