Ndahet nga jeta ikona e filmit dhe teatrit shqiptar, Enver Petrovci

Ka ndërruar jetë në moshën 71-vjeçare aktori dhe regjisor i njohur shqiptar, Enver Petrovci, një nga figurat më të shquara të filmit, teatrit dhe televizionit në Kosovë dhe kudo ku ka shqiptarë.

Lajmin për vdekjen e aktorit, u konfirmua nga i afërmi i tij Amir Petrovci, përmes një postimi në rrjete sociale.

“Me dhimbje dhe pikëllim të madh njoftojmë ndarjen nga jeta të aktorit tonë të dashur, Enver Petrovci. Kjo është një humbje e madhe për familjen tonë dhe për mbarë artin shqiptar. Ai do të kujtohet gjithmonë për shpirtin e tij fisnik dhe veprën e jashtëzakonshme që la pas,” shkroia ai.

Enver Petrovci ishte një emër i njohur për publikun shqiptar. Ai studioi fillimisht në Shkollën e Lartë Pedagogjike në Prishtinë, në degën e aktrimit, dhe më pas përfundoi studimet universitare në Fakultetin e Arteve Dramatike në Universitetin e Beogradit.

Karriera e tij artistike u zhvillua me sukses në teatër, sidomos tek Atelieja 212, ku rolet e tij u vlerësuan në mbarë ish-Jugosllavinë, duke e bërë një nga aktorët më të famshëm të kohës. Pas vitit 1999, ai vazhdoi karrierën kryesisht në Kosovë dhe Shqipëri.

Petrovci ishte gjithashtu njëri nga themeluesit dhe profesorët e parë të degës së Artit Dramatik në Universitetin e Prishtinës.

Në vitin 1989, ai kthehet nga Beogradi për të ligjëruar lëndën e aktrimit, duke ndihmuar në formimin e brezave të rinj të aktorëve në Kosovë.

LEXONI GJITHASHTU:

• Ndahet nga jeta gazetari i njohur Artur Zheji
• Ndahet nga jeta ish-kampioni i Mundjes