Integrimi i Maqedonisë së Veriut, Varhelyi: Konferenca ndërqeveritare të organizohet sa më shpejt

Komisioneri për Zgjerimin, Oliver Varhelyi zhvilloi sot një vizitë në Sofje dhe Shkup, ku është takuar me kryeministrin e Maqedonisë së Veriut, Zoran Zaev, zëvendëskryeministrin për Çështjet Evropiane, Nikola Dimitrov dhe ministrin e Punëve të Jashtme, Bujar Osmani.

Varhelyi theksoi se hapja e negociatave për anëtarësimin e Maqedonisë së Veriut është një prioritet kyç i Bashkimit Evropian.

“Uroj që konferenca e parë ndërqeveritare të organizohet sa më shpejt pas adoptimit të kuadrit negociues nga Këshilli i Bashkimit Evropian. Do të punojmë ngushtësisht me presidencën portugeze për këtë”, u shpreh Varhelyi, ndërsa shtoi se vijimësia e reformave dhe marrëdhëniet e mira fqinjësore janë tepër të rëndësishme për Shkupin.