Komisioni i Disiplinës “ndëshkon” disa klubet shqiptare, arsye sjellja e tifozëve

Komisioni i Disiplinës në Federatën Shqiptare të Futbollit ka shpallur vendimet më të fundit, duke ndëshkuar një sërë klubesh të Kategorisë Superiore dhe Kategorisë së Parë për shkak të sjelljes së gabuar të tifozëve në stadiume. Në fokus të masave ndëshkuese kanë qenë episodet e dhunshme dhe përdorimi i mjeteve piroteknike gjatë ndeshjeve, të cilat kanë sjellë ndërprerje të përkohshme të lojërave dhe rrezik për sigurinë e pjesëmarrësve.

Tirana, gjobë dhe detyrim për dëmshpërblim

KF Tirana është ndëshkuar me një gjobë prej 100 mijë lekësh për ndezjen e flakadanëve dhe ndërprerjen e përkohshme të ndeshjes nga tifozët e saj. Klubi bardheblu është gjithashtu i detyruar të dëmshpërblejë dëmet e shkaktuara në stadiumin “Arena Egnatia” në Rrogozhinë, sipas akt-konstatimit të përpiluar, brenda një afati 15-ditor.

Gjobë maksimale për Teutën dhe Pogradecin

Edhe Teuta e Durrësit është dënuar me një gjobë 100 mijë lekë për sjellje të ngjashme – hedhje objektesh në fushë, ndezje flakadanësh dhe shkaktim të ndërprerjes së ndeshjes.

Për Pogradecin, përveç sjelljes së gabuar të spektatorëve, është theksuar rrezikimi i sigurisë së lojtarëve dhe zyrtarëve të ndeshjes. Gjoba fillestare prej 100 mijë lekësh ulet në 50%, bazuar në nenin 76/1/a të Kodit të Disiplinës.

Vllaznia dhe Elbasani, penalitete për hedhje sendesh dhe flakadanë

KF Vllaznia është dënuar me një gjobë 50 mijë lekë për ndezje të mjeteve piroteknike dhe hedhje sendesh në fushën e lojës, ndërsa AF Elbasani është gjobitur me të njëjtën shumë për hedhje objektesh nga tifozët gjatë ndeshjes.

Paralajmërime për Korabin dhe trajnerin e Besës

Komisioni i Disiplinës ka lëshuar edhe disa paralajmërime. Klubi KS Korabi është vënë në vëzhgim për sjelljen e spektatorëve, ndërsa zyrtari i Besa FC, Shpëtim Duro, është paralajmëruar për refuzimin e daljes në intervistë pas ndeshjes – një veprim që nëse përsëritet, do të sjellë masa disiplinore.

Pezullim për zyrtarin e Dinamos U-19

Artan Sakaj, zyrtar i FC Dinamo City U-19, është ndëshkuar me dy ndeshje pezullim për protesta ndaj vendimeve të zyrtarëve të ndeshjes.