Marc Márquez, kampion bote për herë të nëntë

Në një fundjavë emocionesh të forta dhe adrenalinë të lartë, Marc Márquez ka shkruar një kapitull të ri në historinë e MotoGP-së. Me vendin e dytë në Çmimin e Madh të Japonisë, spanjolli i Ducati-t siguroi matematikisht titullin kampion për vitin 2025 – të shtatin në klasën mbretërore dhe të nëntin në karrierë.

Ky sukses monumental e vendos Márquez krah legjendës Valentino Rossi, duke hyrë në një klub të artë të pilotëve më të suksesshëm në historinë e këtij sporti. Por rekordi nuk ndalet këtu: Márquez bëhet gjithashtu piloti i parë në histori që fiton një titull bote pas më shumë se pesë vitesh nga triumfi i tij i fundit në vitin 2019 një dëshmi e rikthimit të tij të jashtëzakonshëm.

Sezoni i këtij Márquez-i ka qenë thjesht spektakolar:

14 podiume në 17 gara Sprint
11 fitore në total

Vetëm dy gara pa pikë (tërheqje në Austin dhe vendi i 12-të në Jerez)

Forma e tij dominuese nuk i la shumë hapësirë rivalëve, përfshirë edhe vëllain e tij, Alex Márquez, i cili me vendin e gjashtë në Motegi i tha matematikisht lamtumirë ëndrrës për titull.

Fituesi i garës së Japonisë ishte një Francesco “Pecco” Bagnaia i rilindur, i cili përmbylli një fundjavë perfekte me fitoren në Sprint-in e së shtunës dhe triumfin në garën kryesore, pavarësisht problemeve me motorin. Ish-kampioni tregoi karakter dhe vendosmëri në një sezon sfidues për të.

Podiumi u plotësua nga Joan Mir me Honda – rikthim i bujshëm pas katër vitesh mungesë në treshen më të mirë. Më pas vinin Bezzecchi (Aprilia) dhe Morbidelli (Ducati VR46) në vendet 4 dhe 5, ndërsa Bastianini dhe Di Giannantonio nuk patën fundjavën e tyre më të mirë, duke përfunduar në vendet 11 dhe 13.

Një tjetër garë për t’u harruar për Luca Marini, i cili u detyrua të tërhiqej për shkak të problemeve teknike pas vetëm disa xhirosh.

Pas vitesh të errëta të mbushura me dëmtime, operacione dhe dyshime, Marc Márquez ngjitet sërish në majën e botës. Një histori rikthimi që frymëzon dhe konfirmon se legjendat nuk zhduken kurrë ato ribëjnë veten.