Gjermania miraton eksportin e armëve për Izraelin me vlerë 2,46 milionë euro

Qeveria gjermane ka miratuar sërish eksportin e armëve për Izraelin, duke e rikthyer procesin pas një ndalimi të pjesshëm të shpallur në gusht për shkak të luftës së vazhdueshme në Gaza.

Vendimi për ndalimin e përkohshëm u mor më 8 gusht nga kancelari gjerman Friedrich Merz, në përgjigje të shqetësimeve ndërkombëtare mbi operacionet izraelite në Rripin e Gazës, të cilat janë cilësuar nga disa organizata si veprime me karakter gjenocidal.

Megjithatë, Ministria e Ekonomisë konfirmoi në një përgjigje ndaj një hetimi parlamentar të Partisë së Majtë se lejet për eksport janë rifilluar midis 13 dhe 22 shtatorit, me një vlerë totale prej të paktën 2.46 milionë euro (rreth 2.89 milionë dollarë).

Sipas ministres, bëhet fjalë për “pajisje të tjera ushtarake” dhe jo për “armë lufte”, duke shtuar se këto përbëjnë një pjesë të vogël të eksporteve të miratuara më herët.

Ligjvënësja e Partisë së Majtë, Lea Reisner, e kritikoi ashpër vendimin e qeverisë, duke e quajtur rifillimin e eksporteve si një “mashtrim publik”.

“Qeveria gjermane po e mashtron publikun me një ngrirje të supozuar të dorëzimit, ndërkohë që vazhdon të miratojë pajisje ushtarake me vlerë miliona dollarë për Izraelin. Kjo “ngrirje” është shpëlarje e pastër e syve dhe mund të revokohet sipas dëshirës në çdo kohë”, tha ajo.

LEXONI GJITHASHTU:

• Trumpi gjeneralëve ushtarakë: Qytetet amerikane të jenë vende stërvitjeje ushtarake
• Hamasi kërkon ndryshime në planin e Trump, ndasi brenda grupit palestinez