Hamasi kërkon ndryshime në planin e Trump, ndasi brenda grupit palestinez

Zyrtarë të lartë të grupit palestinez po kërkojnë ndryshime në disa pika të planit të paqes të propozuar nga presidenti amerikan Donald Trump për Rripin e Gazës, sipas një burimi nga Hamasi që foli për media AFP.

Negociatorët e Hamasit zhvilluan ditën e djeshme bisedime në Doha me përfaqësues turq, egjiptianë dhe katarianë. Sipas burimit, grupi ka nevojë për “maksimumi dy ose tri ditë” për t’iu përgjigjur propozimeve të reja.

Kërkesat e reja të Hamasit kanë të bëjnë me garancinë ndërkombëtare për një tërheqje të plotë të Izraelit nga Gaza, si dhe siguri që nuk do të ketë përpjekje për arrestime apo vrasje brenda ose jashtë territorit pas arritjes së marrëveshjes.

Sipas AFP-së, brenda Hamasit ekzistojnë ndasi lidhur me pranimin e planit. Disa janë të gatshëm ta pranojnë planin pa kushte, për të siguruar një armëpushim të shpejtë të mbështetur nga SHBA, ndërsa disa të tjerë refuzojnë çarmatimin dhe largimin e qytetarëve palestinezë nga Gaza, duke kundërshtuar plotësisht.

Megjithatë, diskutimet vazhdojnë dhe pritet që “gjërat të bëhen më të qarta së shpejti”, raportojnë autoritetet.

Ndërkohë, plani i Trump, i mbështetur nga kryeministri izraelit Benjamin Netanyahu, parashikon një armëpushim, lirimin e pengjeve të mbajtura nga Hamasi brenda 72 orësh, çarmatimin e grupit dhe tërheqjen graduale të forcave izraelite nga Gaza.

LEXONI GJITHASHTU:

• Presidenti amerikan vendos kapelen “Trump 2028” në tavolinë gjatë negociatave
• OKB: Po punohet për rikthimin e furnizimit me rrymë në juglindje të Ukrainës