Rama: Ne po vrapojmë sa i takon integrimit në BE! Shumë shpejt jemi gati

Kryeministri Edi Rama është përgjigjur para gazetarëve në Kopenhagen në lidhje me integrimin e Shqipërisë në BE. Rama u shpreh se vendi ynë nuk po pret në lidhje me integrimin në BE por po vrapon me shpejtësi.

“Ne nuk jemi duke pritur sa i takon integrimit, ne po vrapojnë me shpejtësi. Ne do jemi gati shumë shpejt dhe varet nga peshat e rënda të diplomacisë evropiane që do të vendosin,” tha ai.

Rama më tej gjatë fjalës së tij u pyet edhe lidhur me sulmet kibernetike teksa theksoi se vendi ka një mbrojtje shumë të mirë kibernetike dhe nuk është cënuar siguria e Shqipërisë.

“Ne kemi qenë pre e sulmeve kibernetike në ta kaluarën por sot kemi mbrojtjen kibernetike me të fortë të Evropës. Ne jemi ende shënjestër e armikut dhe po i zbrapsim gjithë kohës. Nuk kanë arritur të cenojnë sigurinë tonë,” shtoi ai.

Kryeministri theksoi se samitet si ky i sotmi janë të rëndësishëm pasi sipas tij Evropa momentalisht është e dobët përballë kundërshtarëve.

“Këto samite flasin për të ardhmen e Evropës dhe sa më shumë ecim në këtë drejtim aq më mirë është sepse kundërshtarët tanë po rezultojnë të forte. Evropa si një e tërë sa i takon ekonomisë dhe popullsisë së saj tëresore duket shumë e dobët pasi tani nuk është bashkë,” tha ai.

Rama nuk ka pranuar të flasë në lidhje me luftën në Gaza teksa u shpreh se nuk është personi i duhur për këtë konflikt.