“Djali më tha: Kanë vrarë babin”, gruaja e Manecit dëshmon në gjyqin ndaj Dervishajt

Kanë vijuar edhe këtë të premte dëshmitë në procesin gjyqësor ndaj Plaurent Dervishajt dhe Juljan Mecajt, të cilët akuzohen për atentatin ku mbeti i vrarë Andi Maloku, shoferi i ish-prokurorit Arjan Ndoj – sot deputet i PD-së – si dhe u plagos Aleksandër Laho, i njohur ndryshe si Rrumi i Shijakut.

Në gjykatë u paraqit si dëshmitare bashkëjetuesja e Arben Mërkuri, i njohur me nofkën “Maneci”, i vrarë në maj të vitit 2022.

Dëshmia në sallë:

Zonja Shyti tha para trupit gjykues:

“Unë banoj në Sukth, Durrës. Arben Mërkuri ishte bashkëjetuesi im. Nuk kam njohur asnjë nga shokët e tij. Ka ndërruar jetë në maj 2022. Kemi një dyqan në Sukth. Ka punuar edhe në bashki. Më përpara ka pasur mbiemrin Ismaili. Në vitin 2020 i ka vdekur motra në Itali.”

Ajo vijoi:

“Plaurent Dervishajn nuk e njoh. Kam 15 vite që bashkëjetoj me Arbenin. Nuk di asgjë për shokët e tij, as me kë shoqërohej. Kemi dy fëmijë nga bashkëjetesa. Mbaj mend që kishte një telefon. Nuk ka pasur asnjëherë probleme me drejtësinë.”

Për ditën e vrasjes, dëshmitarja rrëfeu:

“Ditën kur u vra Arbeni, kemi qenë bashkë. Dikush e mori në telefon, dhe sapo zbriti shkallët, dëgjuam zhurmë armësh. Djali më tha: ‘Kanë vrarë babin’. Nuk di kush e ka bërë vrasjen. Biznesin e kemi të rregullt, me dokumenta.”

Përballja në sallë me të pandehurin Dervishaj:

Gjatë seancës, i akuzuari Plaurent Dervishaj iu drejtua dëshmitares me pyetje të drejtpërdrejta:

– “A ke marrë vesh çfarë është folur për burrin tënd? Thuhet se ka qenë vrasës me pagesë. S’ka grua që i thotë burrit: shko vrit.”
Zonja Shyti u përgjigj: “Nuk është e vërtetë.”

Dervishaj shtoi:
– “Burri yt ka dhunuar dy gazetarë. E ke parë?”
Për këtë, dëshmitarja tha: “Nuk e kam parë.”

LEXONI GJITHASHTU:

• Vritet me armë zjarri 48-vjeçari në Sukth
• Atentati ndaj prokurorit Ndoj dhe Rrumit të Shijakut, SPAK dërgon për gjykim dosjen