Drita del me kokën lart nga Finlanda, barazim me vlerë ndaj KuPS

Drita e ka nisur me hap të mbarë aventurën në UEFA Conference League, duke marrë një barazim me vlerë 1-1 në transfertë ndaj finlandezëve të KuPS.

Në një ndeshje ku kampionët e Kosovës patën më shumë raste shënimi, mungoi saktësia në finalizim. Pjesa e parë u mbyll pa gola, ndërsa në fraksionin e dytë, vendasit kaluan të parët në avantazh me golin e polakut Parzyszek.

Drita nuk u dorëzua dhe arriti të rikthente baraspeshën në minutën e 80’ me anë të Dabiqajt, duke e mbyllur sfidën me një rezultat pozitiv që i jep shpresë për kualifikim në ndeshjen e kthimit.

Ndërkohë, Shkëndija e Tetovës nuk arriti të bëjë surprizën në Madrid, ku u përball me Rayo Vallecanon, një skuadër me përvojë në La Liga.

Spanjollët dominuan që nga fillimi dhe e mbyllën takimin 2-0, me gola të realizuar nga Lopez dhe Perez në pjesën e parë. Në pjesën e dytë, trajneri Beqiri provoi disa ndryshime në formacion, por nuk mundi të ndikojë në rezultatin përfundimtar.

Shkëndija tashmë do të kërkojë të reagojë në ndeshjen e radhës ndaj irlandezëve të Shelbourne.