Zgjedhjet e 9 nëntorit, zbardhen prapaskenat që dështuan mbledhjen e Rregullatorit

Mbledhja e Komisionit Rregullator në Komisionin Qendror të Zgjedhjeve ka dështuar sot për shkak të mungesës së kuorumit. Dy përfaqësuesit e opozitës, Muharrem Cakaj dhe Helga Vukaj, nuk ishin të pranishëm, duke bërë të pamundur zhvillimin e seancës.

Burime për Euronews Albania bëjnë me dije se Cakaj dhe Vukaj kishin kërkuar shtyrjen e mbledhjes për në datën 6 tetor. Kërkesa është bërë përmes një emaili drejtuar administratës së KQZ-së dhe tre anëtarëve të tjerë të Komisionit Rregullator.

Në mbledhje ishin të pranishëm vetëm tre anëtarët e mazhorancës, Dritan Caka, Ilirjana Nano dhe Arens Cela. Për shkak të mungesës së opozitës, mbledhja u ndërpre zyrtarisht.

Nga ana tjetër, nesër është dita e fundit e mandatit të pesë anëtarëve aktualë të Komisionit Rregullator. Në këtë situatë, nevojitet një vendimmarrje nga Komisioni i Ligjeve në Kuvend për të zgjatur mandatin e këtij organi, në mënyrë që Komisioni Rregullator të mund të vijojë punën dhe të miratojë aktet e nevojshme për zgjedhjet e parakohshme të 9 nëntorit.

Të enjten Euronews Albania nëpërmjet gazetarit Ardit Hoxha bëri me dije se ka një draft që pritej të miratohej këtë shtunë në kuadër të zgjedhjeve të pjesshme.

LEXONI GJITHASHTU:

• Kritikat për Kodin e Ri Penal, Rama: Qeveria palë në proces, po e studiojmë draftin
• Zbardhet drafti i KQZ: Vetëm një javë fushatë për zgjedhjet 9 nëntorit