I akuzuar për trafik droge në vendet e BE, ekstradohet nga Spanja Juxhin Drazhi

Autoritetet spanjolle kanë ekstraduar drejt Shqipërisë shtetasin Juxhin Drazhi, 34 vjeç, i shpallur në kërkim ndërkombëtar nga GJKKO, për përfshirje në një organizatë kriminale që trafikonte lëndë narkotike në Norvegji dhe Belgjikë.

“Nga hetimet e kryera nga SPAK, dyshohet se Juxhin Drazhi ka qenë pjesë e një organizate kriminale që trafikonte lëndë narkotike në Norvegji dhe në Belgjikë”, njofton policia.

34-vjeçari akuzohet si anëtar i grupit të ‘Visit të Pojës’ në Durrës, i cili ishte shpallur në kërkim në maj të këtij viti pas një operacioni të SPAK dhe Guardia di Finanza, të koduar “Ura”, ku u firmosën 50 masa sigurie.

Ai u arrestua më 8 gusht në një vilë luksoze në Granada, ndërsa konsiderohet si personi i fundit që kishte kontaktuar me Miklovan Dakajn, i cili u shpall i zhdukur më 12 maj, ndërsa trupi i pajetë u gjet në fillim të shtatorit në Marbella të Spanjës.

Ndaj Drazhit, i cili u kthye sot në Shqipëri për t’u përballur me drejtësinë shqiptare, janë vendosur edhe masa sekuestro për pronat, mes të cilave edhe “Majestic Konstruktion”.

Në operacionin “Ura” u tha se organizata kishte mundësi të trafikonte sasi të mëdha droge në disa shtete.

Antimafia italiane në atë kohë tha se, në operacione të mëparshme, grupeve kriminale që u goditën u janë sekuestruar 2 ton kokainë në portin e Roterdamit; 932 kilogramë kokainë në portin e Gioia Tauro në Reggio Calabria; dhe 400 kilogramë kanabis në Bari.

“Gjykata e Posaçme e Shkallës së Parë kundër Korrupsionit dhe Krimit të Organizuar Tiranë, me vendimin e datës 30.04.2025, i ka caktuar këtij shtetasi, masën e sigurisë “Arrest në burg”, për veprat penale “Trafikimi i narkotikëve”, kryer në formën e grupit të strukturuar kriminal, “Grup i strukturuar kriminal” dhe “Kryerja e veprave penale nga organizata kriminale ose grupi i strukturuar kriminal”, thuhet në njoftimin e policisë.

Ekstradimi u realizua në kuadër të operacionit ndërkombëtar “The Wanted”, si rezultat i bashkëpunimit mes Interpolit në Tiranë dhe atij në Madrid.

LEXONI GJITHASHTU:

• EMRI/ Në kërkim ndërkombëtar për trafik narkotikësh, arrestohet shqiptari
• Trafiku drogës, kush janë 28 të proceduarit e grupit Ura që GJKKO u rivlerëson masat
• Operacioni anti-drogë i SPAK-DIA: Cilat janë bizneset dhe televizioni i sekuestruar