Prokuroria e Shtetit angazhon 100 prokurorë për mbarëvajtjen e zgjedhjeve në Kosovë

Në Kosovë po mbahen këtë të diel zgjedhjet lokale, ndërsa Prokuroria e Shtetit njofton se ka bërë të gjitha përgatitjet e nevojshme për të garantuar mbrojtjen e votës së lirë të qytetarëve dhe për të siguruar integritetin e procesit zgjedhor.

Në këto zgjedhje janë angazhuar rreth 100 prokurorë të shtetit dhe zyrtarë të sistemit prokurorial, të cilët po qëndrojnë kujdestarë në gjithë territorin e Republikës së Kosovës deri në përfundim të procesit, me qëllim që të procedohet çdo parregullsi që mund të ndodhë gjatë zgjedhjeve lokale të këtij viti.

Prokurorët janë duke qëndruar në zyrat e tyre në qytetet ku funksionojnë prokuroritë themelore, ndërsa në komunat ku prokuroria nuk ka objekt, ata janë të vendosur në stacionet policore. Aty, në bashkëpunim me hetuesit e Policisë së Kosovës, ata do të jenë në mbrojtje të votës së lirë të qytetarëve.

Ndërkohë, koordinatorja nacionale për zgjedhje, prokurorja Laura Pula, po mbikëqyr të gjithë procesin, duke ndjekur zbatimin e detyrave nga koordinatorët rajonalë, prokurorët e angazhuar si dhe prokurorin me detyrë në KQZ.

Zyra e Kryeprokurorit të Shtetit ka ftuar qytetarët e Republikës së Kosovës, subjektet politike, institucionet dhe organizatat e ndryshme që të denoncojnë pranë prokurorive përkatëse çdo rast të dyshuar të keqpërdorimit apo manipulimit të votës, në çfarëdo forme dhe nga kushdo qoftë.

LEXONI GJITHASHTU:

• Kurti thirrje qytetarëve të votojnë: Merrni pjesë në zgjidhjen e problemeve tuaja
• Voton kandidati i LVV për Prishtinën, Çeku: Dita e zgjedhjeve duhet të jetë festë
• Voton Haradinaj: Sot është dita për të marrë vendimet