Begaj i drejtohet Kushtetueses: Hiq pezullimin e dekretit, lejo zgjedhjet në Tiranë

16 ditë nga seanca plenare publike në “Kushtetuese” për çështjen “Veliaj”, presidenca bën parashtrimet e saj.

Ajo i kërkon trupës gjyqësore të Gjykatës Kushtetuese të heqë pezullimin e dekretit dhe të lejojë mbajtjen e zgjedhjeve për kryebashkiak në Tiranë. Madje në parashtrimet e saj i kërkon gjykatës të përcaktojë edhe datën e zgjedhjeve të parakohshme vendore për kryeqytetin.

Për shkak se pezullimi ka pamundësuar zhvillimin e zgjedhjeve për Bashkinë Tiranë në datën e dekretuar nga Presidenti i Republikës, të urdhërojë në përfundim të seancës KQZ-në për përgatitjen e zgjedhjeve për këtë bashki në datën që do të përcaktojë Gjykata Kushtetuese, datë e cila nuk duhet të jetë më e hershme se 30 ditë nga hyrja në fuqi e vendimit të Gjykatës Kushtetuese.

Po aq presidenca i kërkon Gjykatës Kushtetuese që të rrëzojë ankimin e bërë nga kryebashkiaku ende në detyrë i Tiranës Erion Veliaj se përcaktimi i datës së zgjedhjeve për Tiranën është në shkelje të nenin 115 të Kushtetutës.

Të vendosë në përfundim të seancës rrëzimin e kërkesës së Kryetarit të shkarkuar të Bashkisë Tiranë, z. Erion Veliaj, si të pabazuar në nenin 115 të Kushtetutës

Jo vetëm presidenca por edhe Këshilli i Ministrave do të dërgojë në Gjykatë Kushtetuese parashtrimet e tij për vendimin e shkarkimit të Erion Veliaj nga detyra e kryebashkiakut të Tiranës. Vendimi i qeverisë është ankimuar në gjykatë me pretendimin se është shkelur kushtetuta. Shqyrtimi i dy ankimeve nga gjykata do të nisë në fund të tetorit, ku është paralajmëruar edhe mundësia e pranisë fizike të Erion Veliaj në sallën e “Kushtetueses”.

LEXONI GJITHASHTU:

• PD kërkon shkarkimin e tij, reagon Begaj: Pretendimet nuk janë të vërteta
• Kërkoi shkarkimin e Presidentit, PD: Begaj paguhet nga një klinikë private