Kanosën fqinjin e tyre në Shkodër, gjendet arma pranë banesës

Policia e Shkodrës, këtë të premte, ka gjetur dhe sekuestruar armën e zjarrit pistoletë dhe municione luftarake, e cila dyshohet se është përdorur në ngjarjen e ndodhur dy ditë më parë, në fshatin Trush, në Shkodër.

Në këtë ngjarje janë përfshirë 3 shtetas, babai dhe dy djemtë e tij, të cilët  dyshohet se qëlluan në ajër, me armë zjarri dhe me armë gjahu, për të kanosur fqinjin e tyre, shtetasin P. N., për motive të dobëta.

Sipas raportimeve, gjatë kontrollit të territorit në pronësi të shtetasve, është bërë e mundur gjetja e armës së zjarrit, të cilën autorët e dyshuar e kishin fshehur afër banesës së tyre.

Arma e zjarrit do të dërgohet në Institutin e Policisë Shkencore për ekzaminim, për të verifikuar nëse është përdorur në ngjarje kriminale.

Ndërkohë, dy ditë më parë, policia sekuestroi dy armë gjahu dhe vuri në pranga shtetasit Ç. M. dhe D. M. ,babë e bir. Gjithashtu, u shpall në kërkim edhe djali tjetër, shtetasi E. M.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.

LEXONI GJITHASHTU:

• 14 të arrestuarit në aksin Elbasan–Metalurgji mbërrijnë në gjykatë nën masa sigurie