“Liria ka emër”, mijëra shqiptarë në Tiranë: Lironi krerët e UÇK! Mbyllet protesta

Protesta në mbështetje të ish-udhëheqësve të Ushtrisë Çlirimtare të Kosovës, UÇK, e mbajtur pasditen e së premtes në sheshin “Skënderbej” në Tiranë, është mbyllur pas disa orësh me pjesëmarrje të gjerë dhe mes thirrjeve për drejtësi dhe lirimin e krerëve të akuzuar në Hagë.

Qytetarë nga e gjithë Shqipëria dhe Kosova u mblodhën nën moton “Liria ka emër”, në një tubim të organizuar nga Organizata e Veteranëve të Luftës së UÇK-së. Me flamuj kombëtarë dhe simbole të UÇK-së në duar, protestuesit shprehën mbështetjen e tyre për ish-presidentin Hashim Thaçi dhe bashkëluftëtarët e tij.

Gjatë protestës u mbajtën fjalime nga figura të njohura politike dhe historike. Ish-presidenti i Shqipërisë, Alfred Moisiu, në një deklaratë të fuqishme, theksoi se lufta e UÇK-së ishte e drejtë dhe e pastër, dhe se krerët e saj janë burgosur mbi akuza të pabazuara. Ai kujtoi vizitën e tij në Hagë së bashku me ish-presidentë të tjerë shqiptarë, duke vlerësuar qëndrimin e palëkundur të të paraburgosurve.

Në vijim, foli edhe një nga themeluesit e UÇK-së, Ali Ahmeti, i cili deklaroi se drejtësia po vihet në dyshim nga veprimet e Gjykatës Speciale, ndërsa theksoi se UÇK-ja nuk ka shkelur ligjet e luftës dhe ka mbrojtur popullin e vet nga genocidi.

Në shesh ishin të pranishëm gjithashtu kryetari i Prishtinës, Përparim Rama, përfaqësues nga trevat shqiptare dhe familjarë të ish-krerëve të UÇK-së, përfshirë Endrit Thaçin, djalin e ish-presidentit Thaçi.

Për shkak të pjesëmarrjes së lartë, autoritetet morën masa për bllokimin e përkohshëm të disa segmenteve rrugore për të mundësuar zhvillimin e protestës.

Protesta u mbyll në mënyrë të rregullt, duke përçuar një mesazh të qartë solidariteti dhe kërkesë për drejtësi në mbrojtje të luftës çlirimtare të Kosovës.

LEXONI GJITHASHTU:

• Veteranët e UÇK-së falënderojnë Ramën, dhuratat simbolike që iu përcollën në Tiranë
• VIDEO/ “Dhe në mbetsha aty, aty do të vij,”, flet Moisiu në protestën për UÇK-në