Lituania pretendon se avionët rusë kanë shkelur hapësirën e saj ajrore, reagon Moska

Avionët ushtarakë rusë shkelën për pak kohë hapësirën ajrore të Lituanisë mbrëmë, njoftoi presidenti i vendit, Gitanas Nauseda, duke e quajtur incidentin një shkelje të qartë të integritetit territorial të vendit anëtar të BE-së dhe NATO-s.

“Kjo është një shkelje e qartë e së drejtës ndërkombëtare dhe integritetit territorial të Lituanisë”, shkroi Nauseda në rrjetin X, raportoi AP.

Ministria e Punëve të Jashtme e Lituanisë planifikon të thërrasë përfaqësuesit e ambasadës ruse në Vilnius për të protestuar ndaj incidentit.

Forcat e armatosura lituaneze deklarojnë se dy avionë ushtarakë rusë – Su-30 dhe Il-78, hynë në hapësirën ajrore lituaneze në rreth 700 metra rreth orës 18:00 sipas orës lokale dhe e lanë atë pas rreth 18 sekondash.

Besohet se aeroplanët kanë qenë duke kryer ushtrime furnizimi me karburant në enklavën ruse të Kaliningradit.

Dy avionë luftarakë spanjollë, pjesë e misionit të policisë ajrore të NATO-s, u ngritën dhe ndërhynë.

Ministria ruse e Mbrojtjes i hodhi poshtë pretendimet e Lituanisë, duke thënë se aeroplanët fluturuan mbi Kaliningrad në përputhje me rregullat dhe nuk shkelën kufijtë e vendeve të tjera.

Vendet baltike janë tashmë në gatishmëri të shtuar për shkak të sulmeve ruse ndaj Ukrainës, dhe incidentet e fundit me dronë dhe shkeljet e hapësirës ajrore kanë rritur më tej shqetësimet se Moska po teston reflekset mbrojtëse të NATO-s.

Më herët gjatë ditës, Nauseda mori pjesë në samitin e Këshillit Evropian në Bruksel, ku u miratua plani “Gatishmëria 2030” për të forcuar aftësinë mbrojtëse të BE-së deri në fund të dekadës.

LEXONI GJITHASHTU:

• Kontrollet në kufi, zbulohet tunel që lidh Bjellorusinë me Poloninë
• Polonia zgjat mbrojtjen për refugjatët ukrainas