Sunderlandi i Xhakës përmbys Chelsean, ngjitet në vendin e dytë të Premier League

Sunderlandi i Granit Xhakës ka regjistruar një fitore të madhe në Stamford Bridge, duke mposhtur Chelsean me përmbysje 1-2 në kuadër të javës së nëntë të Premier League.

Edhe pse “Blutë” e Londrës dominuan dhe krijuan më shumë raste, efikasiteti i Sunderlandit bëri diferencën.

Takimi nisi vrullshëm, dhe që në minutën e katërt Alejandro Garnacho kaloi Chelsean në epërsi pas një kombinimi të bukur me Pedro Neton.

Reagimi i miqve erdhi shpejt dhe në minutën e 22-të Uilson Isidor përfitoi nga një kundërsulm i shpejtë, duke barazuar rezultatin në 1-1.

Në pjesën e dytë ritmi ra ndjeshëm, me Chelsean që tentoi me Joao Pedron dhe Garnachon, por pa sukses në finalizim.

Kur gjithçka dukej e mbyllur, Chemsdine Talbi “shpërtheu” në minutat shtesë (90+3’), duke realizuar një supergol pas asistimit të Brobbey, që vulosi fitoren e madhe të Sunderlandit, ku titullar ishte Granit Xhaka.

Me këtë fitore, Sunderland ngjitet në vendin e dytë të Premier League me 17 pikë, ndërsa Chelsea bie në vendin e shtatë me 14 pikë, duke humbur terren në garën për kreun.

LEXONI GJITHASHTU:

• VIDEO/ Dramë në San Siro, Milan ndalet nga Pisa në barazim 2-2
• Santiago Bernabeu mirëpret klasiken Real–Barcelona, “Los Blancos” cilësohen favoritë