Emocionohet Ruçi: Fatos Nano vëllai dhe kryetari im! Mesazhi pas homazheve

Në Pallatin e Kongreseve kanë nisur në orën 08:30 homazhet në nder të ish-kryeministrit Fatos Nano i cili humbi jetën më 31 tetor.

Miq, dashamirës, përfaqësues të artit e politikës kaluan pranë arkëmortit të mbështjellë me flamurin kombëtar të liderit historik të PS për t’i bërë nderimet e fundit.

Ish-deputeti socialist Gramoz Ruçi, dhe një nga bashkëpunëtorët e ngushtë të ish-kryeministrit Nano, në një deklaratë për mediat pas homazheve e cilësoi Fatos Nanon si njeriun e parë që reformoi PS dhe si njeriun i cili në zgjedhjet e para dhe të fundit që humbi dha dorëheqjen duke i lënë rrugën të hapur të rinjve.

“Një komb e një popull e shfaq veten me njerëzit që nxjerr por edhe për mënyrë, formën dhe përmbajtjen se si i nderon dhe përkujton. Sot është dita që të nderojmë Fatos Nanon si themeluesin e PS, si i pari reformues, si i pari demokratizues i PS, si i parë transformues i PS. Si lider i PS në 14 vjet, kurrë nuk ka për të ndodhur më që në harkun e 14 vjetëve 4 vjet t’i kalosh në izolim dhe 8 vjet ta mbash forcën politike në pushtet në dekadën e parë themelimit si asnjë forcë tjetër politike. Do mbahet mend si i pari që në zgjedhjet e para dhe të fundit që humbi dha dorëheqje të parevokueshme duke e lënë të lirë gjeneratën e re për të marrë drejtimin. Do mbahet mend si njeri i cili shprehjen që thoshte shpesh: do sakrifikojmë pushtet për të ndërtuar shtet e bëri realitet. I paharruar kujtimi i vëllait tim, i kryetarit tim”, tha Ruçi.

LEXONI GJITHASHTU:

• Grupi Parlamentar i PS-së dhe ish-deputetë homazhe në nderim të Nanos
• Ndarja nga jeta e Fatos Nanos, Rexhep Qosja: Një nga figurat më të gjithanshme