Bayern bind ndaj Leverkusen, me disa ndryshime në formacion fiton 3-0

Ky sezon do të mbahet mend gjatë nga tifozët e Bayernit të Mynihut, skuadër e cila e ka nisur në mënyrë perfekte.

Ekipi i udhëhequr tashmë prej 2 sezonesh nga belgu Kompany ka vendosur një rekord të jashtëzakonshëm, ku i ka fituar 15 ndeshjet e para në të gjitha kompeticionet. Pra që prej muajit gusht, rekordmenët e Gjermanisë kanë rrëmbyer vetëm fitore ndaj çdo kundërshtari, i fundit Leverkusen pasditen e së shtunës në Bundesligë.

Të martën mbetet për t’u parë nëse Bayern do tja dalë të marrë një tjetër fitore, pasi përballet në Champions me kampionët në fuqi, PSG. Pikërisht për të mbajtur skuadrën të freskët për këtë duel, Kompany bëri rotacion ndaj aspirinave, duke lënë në stol Kane, Olise, Diaz, Upamecano, por sërish nuk hasi asnjë vështirësi.

Të 3 golat e ndeshjes u shënuan që në pjesën e parë, fillimisht Gnabry hapi serinë, më pas dyfishoi Jackson, teksa rezultati u vulos pas një autogoli të Bade. Në pjesën e dytë vendësit vetëm administruan rezultatin, teksa pjesë e lojës u bënë dhe disa nga lojtarët e formacionit bazë. Kjo ishte fitorja e 15-të për Bayernin në të gjitha kompeticionet këtë sezon, ndërsa udhëheq kampionatin me 5 pikë më tepër se vendi i dytë.