Prokurori i Madridit në gjyq, akuzohet për rrjedhje informacioni të klasifikuar

Prokurori i përgjithshëm i Madridit, Avaro Garcia Ortiz ka dalë para gjykatës pasi akuzohet për rrjedhje të informacionit konfidencial në lidhje me partneren e një politikani të opozitës. Gjykata Supreme e Madridit është përpjekur që nga e hëna të përcaktojë nëse  Ortiz ka shkelur me vetëdije konfidencialitetin e hetimit duke i dhënë shtypit një dokument konfidencial në lidhje me biznesmenin Alberto Gonzalez Amador me qëllim dëmtimin e imazhit të partneres së tij, Isabel Diaz Ayuso, presidente e rajonit të Madridit.

Në qendër të çështjes është një email në të cilin avokatët e Gonzalez Amador i propozuan prokurorisë që klienti i tyre të pranonte fajësinë për evazion fiskal në këmbim të një dënimi të reduktuar.

“Në 22 vitet e mia të karrierës, z. García Ortiz nuk më ka dhënë kurrë asnjë dokument”, tha zëvendësdrejtori i faqes së internetit ElDiario.es. Ai tha se mësoi për ekzistencën e emailit rreth një javë para se të publikohej në shtyp.

Ashtu si gazetarët e tjerë që dëshmuan sot, ai siguroi se prokurori i përgjithshëm është “i pafajshëm”, siç këmbëngul ai vetë.

Çështja filloi në muajt e parë të vitit 2024, kur sistemi i drejtësisë po hetonte Alberto Gonzalez Amador nën dyshimin për mashtrim tatimor, nga i cili ai fitoi 350,000 euro, gjatë pandemisë Covid-19.

Në mars të vitit 2024, disa media publikuan informacione rreth çështjes dhe në veçanti diskutimet që zyra e prokurorit të Madridit pati me avokatin e Gonzalez Amador për të arritur një marrëveshje midis tyre.

LEXONI GJITHASHTU:

• Bosnje: Arrin në 30 numri i të plagosurve nga zjarri në azilin e pleqve
• Këshilli Ndërfetar i Shqipërisë reagon për barazinë gjinore: Duhet të ruajmë vlerat