“Streha” mohon akuzat e Luanës: E ndihmuam në bazë të procedurave shtetërore

Deklarata e Luanës në emisionin “Review” në Euronews Albania, ku ajo akuzoi një qendër të komunitetit LGBT se e kishte marrë nga familja dhe ushtruar presion ndaj saj, ka ngjallur reagime të forta.

Pas reagimeve të shumta, ka ardhur edhe përgjigjja e qendrës “Streha”, e cila mohon akuzat dhe kërkon hetim nga Prokuroria.

Qendra “Streha” sqaroi për Euroneës Albania, se Luana Myrto është ndihmuar nga organizata për tre vite dhe se vendosja e saj në qendër ka qenë pjesë e një procesi institucional për mbrojtjen e personave në rrezik.

“Luana nuk është ‘marrë’ nga familja dhe futur në qendër, por vendosja e saj në shërbim ka qenë rezultat i një vendimi të institucioneve shtetërore për mbrojtje emergjente. Në atë kohë ajo ishte 16 vjeç dhe në situatë të lartë rreziku. Saktësojmë se strehimi ishte i përkohshëm dhe përjashtimor, pasi qendra ‘Streha’ është e specializuar të punojë vetëm me individë mbi 18 vjeç. Ne i qëndrojmë me rigorozitet të gjitha procedurave të ndjekura në menaxhimin e rastit të E. Myrtollarit dhe ftojmë Prokurorinë dhe organet e ndjekjes penale të nisin menjëherë hetimet e nevojshme, në mënyrë që transparenca dhe e drejta e personit të mbrohen plotësisht”, thuhet në reagimin e qendërs “Streha”.

Pas rrëfimit të Luanës në Euronews Albania, figura të njohura publike kërkuan që ajo të merrej në mbrojtje nga policia, duke e konsideruar dëshminë e saj si një “zberthim” të agjendës LGBTQI+.

LEXONI GJITHASHTU:

• “14 vjeçe më morën”, Luana Myrto ndaj shoqatës LGBT: Më premtuan se do më shkollonin