“Nuk ishte protestë”, deputeti i PD: Foltorja në përgjigje të censurës në parlament

Deputeti i PD-Së, Bardh Spahia, ishte i ftuar në “NOW me Erla Mëhillin”, ku u shpreh se tubimi para Kryeministrisë nuk ishte në vetvete një protestë, por një foltore parlamentaro-qytetare.

Ai tha se PD-ja dhe opozita, sa herë ka qenë nevoja për t’u përfaqësuar me numra, kanë qenë në nivelet maksimale dhe sipas tij kjo nuk vihet në dyshim.

Spahia sqaroi se tubimi ishte ideuar në këtë formë për t’u dhënë hapësirën e munguar përfaqësuesve të opozitës dhe qytetarëve me bindje opozitare, me qëllim zëvendësimin e hapësirës së mohuar në seancat parlamentare.

“Dua ta saktësoj se kjo e sotmja nuk ishte protestë, për hir të së vërtetës, por ishte një foltore parlamentaro-qytetare, që u ideua dhe do të vazhdojë të jetë e tillë për t’u dhënë zë parlamentarëve të cilëve u është hequr e drejta e fjalës në Parlament gjatë këtyre seancave, siç e keni parë të gjithë. Ishte gjithashtu një mënyrë për të sjellë zërin e opozitës sa më pranë qytetarëve, duke i dëgjuar dhe duke i bërë pjesë të kësaj foltore”, tha ai.

Sipas Spahisë, mesazhi i kësaj foltore ishte që opozitës nuk mund t’i mbyllet goja dhe nuk mund t’i mohohen diskutimet që, sipas tij, mazhoranca ua ndalon me forcën e kartonit.

LEXONI GJITHASHTU:

• Foltorja e PD-së para Kryeministrisë, Gjoni: Qytetarët janë braktisur nga shteti
• Mbyllet protesta e opozitës para Kryeministrisë, Berisha: Kjo është foltorja e dytë