Oficeri i policisë përplas për vdekje këmbësorin në aksin Maliq-Lozhan

Një aksident i rëndë me pasojë vdekjen e një personi ka ndodhur ka ndodhur në afërsi të kryqëzimit të fshatit Kolanec mbrëmjen e sotme.

Ngjarja ka ndodhur teksa një këmbësor është goditur nga një mjet duke gjetur vdekjen menjëherë.

Mësohet se viktima është banor i fshat Maliq, i cili ka qenë duke ecur në këmbë nga qyteti i Maliqit në drejtim të fshatit të tij ndërkohë që mjeti që e ka aksidentuar ka qenë duke lëvizur nga Lozhani në drejtim të qytetit të Maliqit.

Burime të siguruara thane se drejtuesi i mjetit është një oficer policie i komisariatit të Maliqit i cili ka qenë me shërbim në këtë aks rrugor ku lëvizin edhe refugjatë si dhe persona të dyshuar për prerjen e lëndëve drusore.

Duhet thënë se i gjithë segmenti i rrugës është pa ndriçim, ç’ka e bën të vështirë edhe fushëpamjen e drejtuesve të mjeteve.

Njoftimi zyrtar i policisë:

Rreth orës 18:10, në aksin rrugor “Maliq-Lozhan”, automjeti me drejtues shtetasin D. Q.,(punonjës policie), ka përplasur shtetasin B. H., rreth 67 vjeç.

Si pasojë e përplasjes, 67-vjeçari ka ndërruar jetë në vendngjarje.

Drejtuesi i automjetit është shoqëruar në Drejtorinë Vendore të Policisë Korçë, për veprime të mëtejshme.

Grupi hetimor dhe AMP ndodhen në vendngjarje dhe, nën drejtimin e Prokurorisë, po punojnë për të përcaktuar rrethanat dhe shkakun e aksidentit.