VIDEO/ Tregtonin armë zjarri, dy të arrestuar dhe një kërkim në Kamëz

Dy persona janë arrestuar në Kamëz, ndërsa një tjetër është shpallur në kërkim, pasi dyshohet se ishin pjesëtarë të një grupi që shiste armë zjarri në Tiranë.

Policia ka vënë në pranga 29-vjeçarin Bledar Jella dhe 60-vjeçarin Xhemal Shehi, ndërsa në kërkim është shpallur 29-vjeçari S.C., të tre banues në Kamëz. Gjatë operacionit janë sekuestruar dy armë zjarri pistoleta dhe municion luftarak, që dyshohet se do të shiteshin në Tiranë.

Operacioni, i koduar “Members”, vjen pas tre muaj hetimesh nga Komisariati i Policisë në Njësinë 5, ku u identifikuan tre persona të dyshuar si pjesëtarë të një grupi kriminal që shiste armë zjarri.

Vijojnë hetimet, nën drejtimin e Prokurorisë, për dokumentimin e plotë të veprimtarisë kriminale të këtyre shtetasve, identifikimin dhe kapjen e personave të tjerë të përfshirë në grup ndërsa materialet procedurale iu referuan Prokurorisë për veprime të mëtejshme.