Minatorët e Trepçës 7 orë të ngujuar në minierë qindra metra nën tokë

Dhjetëra minatorë të Trepçës kanë mbetur të ngujuar qindra metra nën tokë. KosovaPress mëson se kjo për shkak të një defekti në furnizimin me energji elektrike.

Kryetari i Sindikatës së Minatorëve, Ibrahim Januzi ka deklaruar për KosovaPress, se ende nuk ka informata të plota për situatën.

“Për shkak të një defekti në energji elektrike ka mbetur i ngujuar ndërrimi i dytë. Nuk kam shumë informata, sepse ende nuk jam njoftuar nga askush. Edhe unë këtë e kam kuptuar nga lajmet”, ka thënë ai.

Ndërkaq, sipas portalit “Jepi zë”, minatorët e ndërrimit të dytë janë ngujuar në horizontet 10, 9 dhe 8.

Para disa ditësh ngjashëm, si pasojë e ndërprerjes së energjisë, pesë pompistë kujdestarë kishin mbetur të ngujuar për rreth 8 deri në 9 orë.