Protesta e PD, Berisha: Jemi në një moment kritik, të bashkohemi sot në rrugët e Tiranës

Kreu i Partisë Demokratike, Sali Berisha ka folur në një komunikim për mediat lidhur me organizimin e protestës që do të mbahet pasditen e sotme.

Berisha u bëri thirrje dhe një herë të gjithë qytetarëve që t’i bashkohen protestës dhe thekson se prania e çdo demokrati vjen si një mesazh edhe për ata qytetarë që janë jashtë Shqipërisë, në BE, SHBA e më tej. Kreu i PD thekson se synimi mbetet rrëzimi i qeverisë dhe fitorja e opozitës.

“Pak orë na ndajnë nga uragani i madh i shpresës dhe fitores së opozitës dhe kombit shqiptar.

Unë erdha përsëri t’u drejtoj thirrjen time si shqiptari-shqiptarit, si qytetari-qytetarit, të bashkohemi sot në bulevardet dhe rrugët e Tiranës në një nga momentet më kritike të historisë tonë.

Sot në Bruksel përfaqësuesit e vendeve më të mëdha të Europës patën para tyre narko-diktatorin e parë të kontinentit, Edi Ramën.

Ndaj dhe sot më shumë se kurrë duhet të jemi në atë bulevard, në ato rrugë, në ato sheshe për të përcjellë mesazhin tonë se ne nuk pajtohemi kurrë me një organizatë hajdutësh, që u ka vjedhur shqiptarëve shuma përrallore të buxhetit, pasuri të pafundme publike, ka vendosur ligjin e mafies dhe tani do me çdo kusht t’u vjedhë të ardhmen evropiane.

Prania jonë sot është mesazhi më i shkëlqyer, është mesazhi më dinjitoz që ne u përcjellim shqiptarëve në Shqipëri dhe të katër anët e dheut, por që ne u përcjellim edhe miqve tanë të vërtetë në BE, SHBA dhe kudo që janë”, tha Berisha.