Shtyhet seanca në GJKKO, ekspertët mjeko-ligjorë do të përcaktojnë gjendjen shëndetësore të Mario Çelës

Gjykata e Posaçme ka vendosur që të shtyjë seancën lidhur me kërkesën e vëllai i Suel Çelës, Mario Çela për zëvendësim të masës së Sigurisë për shkaqe shëndetësore.

Seanca u shty në mënyrë që disa ekspertë mjeko-ligjor të përcaktojnë gjendjen shëndetësore të Mario Çelës dhe nëse i përmbush kushtet për zëvëndësim mase.

Ai nuk është paraqitur në seancën dhe u përfaqësua nga avokati Artan Gjermeni. Mario Çela po qëndron në Spitalin e Burgjeve, pasi ka pretenduar probleme shëndetësore.

Mario Çela u arrestua disa kohë më parë në Belgjikë, në kuadër të operacionit të SPAK, i cili lëshoi asokohe 21 urdhër-arreste, mes të cilave edhe për vëllain e Suel Çelës.

GJKKO ka vendosur masën e sigurisë “Arrest në burg” për disa vepra penale, “Vrasja me paramendim”, ”Organizata kriminale”, ”Mbajtja pa leje dhe prodhimi i armëve, armëve shpërthyese dhe municionit” dhe ”Korrupsioni aktiv ne sektorin privat”.