PDK: Të respektohet procesi institucional dhe të pritet vendimi i Gjykatës Kushtetuese

Partia Demokratike e Kosovës, PDK ka reaguar për ftesën e marrë nga kryeministri Albin Kurti për takim për çështjen e presidentit. PDK thekson se mbetet e hapur për komunikim dhe dialog politik sa herë që kjo i shërben stabilitetit institucional dhe interesit të vendit.

Më tej në reagim, PDK shton se është e domosdoshme të pritet vendimi përfundimtar i Gjykatës Kushtetuese, i cili pritet deri më 31 mars dhe që do të qartësojë hapat e mëtejshëm institucionalë.

Partia Demokratike e Kosovës shton se respektimi i vendimeve të Gjykatës Kushtetuese dhe i procedurave institucionale është mënyra më e përgjegjshme për të garantuar stabilitet politik dhe institucional në vend.

Gjykata Kushtetuese ka vendosur Masë të Përkohshme që pezullon procesin e zgjedhjes së Presidentit dhe çdo veprim të mëtejshëm të Kuvendit në këtë drejtim.