VIDEO/ Zbulohet laboratori për falsifikimin e diplomave dhe licencave profesionale, arrestohet 51-vjeçari në Tiranë

Një person është vënë në pranga nga policia në Tiranë. Arrestimi i tij mësohet se ka ardhur pasi ai kishte krijuar një laborator për falsifikimin e diplomave të shkollave të mesme, universiteteve të ndryshme, si dhe licencave profesionale.

Në pranga është vënë një 51-vjeçar i identifikuar si Abas Tafa. Sipas njoftimit të policisë gjatë kontrollit të banesës së 51-vjeçarit në Zall-Bastar u zbulua ambienti i fshehtë për prodhimin dhe falsifikimin e diplomave.

Aktiviteti i paligjshëm ushtrohej prej kohësh nga Tafa dhe çmimi i diplomave të falsifikuara arrinin nga 600 euro deri në 5000 euro. Policia po punon për identifikimin e personave të tjerë të përfshirë në këtë aktivitet.

“Tiranë/Finalizohet nga Seksioni i Hetimit të Krimeve Ekonomiko-Financiare, nën drejtimin e Prokurorisë, operacioni policor i koduar “Laboratori”.

Zbulohet një ambient i përshtatur si laborator për falsifikimin e diplomave të shkollave të mesme, universiteteve të ndryshme, si dhe licencave profesionale.

Sekuestrohen qindra dokumente të dyshuara të falsifikuara dhe sende të tjera të kundërligjshme, që shërbenin për ushtrimin e kësaj veprimtarie kriminale.

Vihet në pranga një shtetas. Seksioni i Hetimit të Krimeve Ekonomiko-Financiare, nën drejtimin e Prokurorisë, si rezultat i një pune të mirëorganizuar, finalizoi me sukses operacionin policor të koduar “Laboratori”.

Si rezultat i këtij operacioni, u arrestua shtetasi A. T., 51 vjeç. Gjatë kontrollit të banesës së 51-vjeçarit, në Zall-Bastar, shërbimet e Policisë zbuluan një ambient të fshehtë, të kthyer në laborator për prodhimin dhe falsifikimin e diplomave të shkollave të mesme, universiteteve, programeve master dhe licencave profesionale.

Po punohet për identifikimin e personave të tjerë të përfshirë në këtë aktivitet. Materialet procedurale iu referuan Prokurorisë së Tiranës, për veprime të mëtejshme”, njofton policia.