Kryetarja e Grupit Parlamentar të LDK: Kurti nuk dëshiron kompromis me partinë tonë

Kryetarja e Grupit Parlamentar të Lidhja Demokratike e Kosovës (LDK), Jehona Lushaku-Sadriu, ka deklaruar se kryeministri i Kosovës Albin Kurti nuk po e dëshiron Vjosa Osmani për një mandat të ri presidencial.

Në një postim në rrjetin social Facebook, Lushaku-Sadriu tha se Kurti “nuk dëshiron kompromis me LDK-në”, duke e akuzuar atë për qëndrim të ngurtë politik. Sipas saj, kryeministri ka tentuar të “përmbysë rendin kushtetues” dhe se situata aktuale nuk përbën vetëm krizë politike, por “krizë të një njeriu që s’pranon rend e ligj”.

Më herët ditën e sotme, kryeministri i Kosovës, Albin Kurti, akuzoi partitë opozitare se me mospjesëmarrje në seancën për zgjedhjen e presidentit po tregojnë se “nuk kanë qëllim tjetër përveç se bllokimit”.

Në një konferencë për mediat sot, Kurti u pyet për 15 nënshkrimet e prezantuara një natë më parë nga LDK-ja.

Kreu i LVV-së tha se LDK nuk tregoi se për cilin kandidat të saj për president ishin nënshkrimet, duke shtuar se ato nuk i janë dërguar atij apo shefes së deputetëve të LVV-së, Arbërie Nagavcit.