Artan Hoxha për kroçerat luksoze: Miliarderët e botës e blejnë naftën në Shqipëri më lirë se fermerët

Gazetari Artan Hoxha bëri deklarata të forta lidhur me turizmin detar në Shqipëri, duke kritikuar përfitimet reale nga kroçerat dhe jahtet luksoze që ankorohen në portet shqiptare.

Në një intervistë për Euroneës Albania Hoxha tha se Shqipëria nuk përfiton ekonomikisht nga kroçerat që ndalojnë në portet e Durrësit, Sarandës apo Vlorës, pasi turistët zbresin vetëm për pak kohë dhe largohen pa konsumuar në ekonominë lokale.

“Turistët që vijnë me kroçera zbresin, bëjnë një xhiro, as kafe nuk pinë. Plus, kroçera aty pastron ca gjëra që ka për të pastruar, i lë aty dhe ikën. Pra, ne nuk përfitojmë ndonjë gjë nga kjo”, u shpreh ai.

Hoxha tha se jahtet më të mëdha të botës ndalojnë në Sarandë kryesisht për shkak të karburantit të lirë që ofrohet në Shqipëri.

“Mund të jetë jahti i Jeff Bezos apo kushdo tjetër. Ata janë miliarderë sepse blejnë lirë dhe shesin shtrenjtë”, deklaroi gazetari, duke shtuar se Shqipëria ua shet karburantin “më lirë se sa ua jepnim traktorëve në Myzeqe”.

Ai krahasoi situatën me destinacione të zhvilluara turistike si Korfuz, duke theksuar se Shqipëria ende nuk ka infrastrukturën dhe kapacitetin për të mbajtur turistët për më gjatë dhe për të gjeneruar të ardhura reale nga turizmi detar.