“Non grata ka rënë”, Spahia: Ky është një lajm i mirë për Shqipërinë, jo vetëm për Berishën

Deputeti i Partisë Demokratike Bardh Spahia tha në emisionin Now në Euronews Albania se non grata ndaj kreut të PD është hequr dhe ky është një lajm i mirë edhe për Shqipërinë, jo vetëm për Berishën.

Sipas tij, vendimi i sotëm është vetëm finalizim i asaj që ka nisur që me ardhjen e administratës Trump, që siç tha, e bëri të qartë që do të shfuqizonte vendimet politike të administratës Biden.

“Shpifje keqdashëse për të gjunjëzuar lidershipin e PD-së, por edhe opozitarizmin shqiptar. Sot është shkërmoqur, ka rënë. Ky është vetëm akti final i një nisme që ka nisur para zgjedhjeve të 11 majit, kur përfaqësues të administratës së re amerikane deklaronin që nuk donin më që marrëdhënia e SHBA-së me Shqipërinë të ndikohej nga vendime politike të administratës Biden.

Para zgjedhjeve të 11 majit ka pasur shprehje të qarta të kësaj kundër këtyre efekteve të politikës së administratës së shkuar. Ky është një lajm i mirë jo vetëm për opozitën shqiptare. Nuk është një vendim që i intereson vetëm Sali Berishës. Është lajm i mirë për opozitën dhe Shqipërinë në tërësi, sepse po shkon në vend një padrejtësi e madhe që është bërë ndaj opozitës shqiptare”, tha Spahia.